أولًا: الشفافية من أول دقيقة

شركة محترفة:

من أول مكالمة أو اجتماع، بيشرحولك كل حاجة بوضوح.

يقولولك المشروع هياخد وقت قد إيه، وتكلفته كام، وهيمر بمراحل إزاي.

بيبعتولك عرض سعر مكتوب ومفصل، مش “رقم على الواتساب”

شركة نصب:

يقولك كلام عام ومبهم: “مشروعك بسيط جدًا – نعمله بسرعة”.

يتفادوا إنهم يدوك عرض مكتوب، وكل شوية يغيروا السعر.

لما تسأل عن تفاصيل التنفيذ، يقولك “متقلقش، كله هيظبط”.

نصيحة: أي شركة بتتهرب من التفاصيل = علامة خطر.

تانيًا: العقد هو الأساس

شركة محترفة:

بتكتب عقد واضح يضمن حقك وحقهم

العقد بيشمل: تفاصيل المشروع، السعر، مدة التنفيذ، سياسة التعديلات، الدعم الفني

بيسمحولك تاخد نسخة منه وتراجعه براحتك

شركة نصب:

يقولك “إحنا ناس ثقة… مش محتاجين عقد”

أو يكتبوا عقد بسيط جدًا، من غير أي تفاصيل ملزمة

بعد ما تدفع، تبدأ تسمع جملة “ده مش داخل في الاتفاق”

نصيحة: ما تمضيش عقد ناقص أو غامض، وما تدفعش فلوس من غير عقد.

تالتًا: سابقة الأعمال بتتكلم

شركة محترفة

عندهم سابقة أعمال واضحة ومثبتة.

يدوك روابط لمواقع أو تطبيقات شغالة بالفعل.

تقدر تكلم عملاءهم القدامى وتسمع رأيهم.

شركة نصب

يقولك “اشتغلنا على مشاريع كتير… بس العميل منعنا ننشرها”

أو يورّيك صور تصميمات من غير أي روابط حقيقية

لما تطلب تجرّب مشروع نفذوه، يتحججوا بأي سبب

نصيحة: المشروع اللي مش تقدر تجربه بنفسك، اعتبره مش موجود.

رابعًا: طريقة التعامل والتواصل

شركة محترفة

بيردوا على استفساراتك بسرعة وبشكل واضح

بيكون في شخص مسؤول عن المشروع تقدر تتواصل معاه مباشرة

بيستخدموا أدوات لإدارة المشروع زي Trello – Slack – Notion)

شركة نصب

الردود دايمًا متأخرة أو متلخبطة

مش عارف تتواصل مع حد مسؤول فعليًا

مفيش أي وسيلة متابعة أو خطة واضحة

نصيحة: شركة التواصل معاها صعب في البداية، هتكون كابوس في وسط المشروع

خامسًا: الوعود المنطقية او الوعود الزائفة

شركة محترفة

بتديك وعود واقعية، وتشرحلك تحديات المشروع

لو طلبت فكرة صعبة التنفيذ، بيشرحوا ليك البدائل

بيقولولك المشروع ممكن ينجح أو يفشل حسب التنفيذ والتسويق

شركة نصب

وعود وردية بدون أي أساس: “هتعمل ملايين أول شهر”

“هنخلص المشروع في أسبوع”، حتى لو مشروع معقد

“سيب كل حاجة علينا”، من غير ما يطلبوا أي تفاصيل منّك

نصيحة: أي حد يقولك “كل شيء سهل” في البرمجة، غالبًا بيكذب عليك.

سادسًا: السعر المناسب مش الأرخص

شركة محترفة

السعر يكون مبني على شغل حقيقي ومراحل تنفيذ واضحة

يوضحولك إيه اللي داخل في السعر، وإيه ممكن يزوّد التكلفة.

يقبلوا تفاوض محترم، لكن ما بيقللوش من قيمة شغلهم.

شركة نصب:

يرمولك رقم مغري جدًا (رخيص بشكل مبالغ فيه).

أول ما تبدأ، تلاقي كل شوية طلبين فلوس زيادة.

في الآخر، تكتشف إنك دفعت كتير لمشروع ضعيف الجودة أو مش كامل.

نصيحة: السعر الرخيص قوي = مشروع ناقص أو مضروب في الغالب.

سابعًا: الدعم بعد التسليم

شركة محترفة:

بتقدملك فترة ضمان بعد التسليم (مثلاً شهر أو 3 شهور).

يصلحوا أي مشاكل تظهر في الكود بدون تكلفة إضافية.

ممكن يعرضوا عقد صيانة شهري أو سنوي.

شركة نصب:

أول ما يستلموا الفلوس، يختفوا.

لو حصلت مشكلة، يقولك: “ده خارج الاتفاق”.

أو يطلبوا منك تدفع تاني علشان يصلحوا غلطهم.

نصيحة: اتأكد إن في دعم فني حقيقي قبل ما تسلّم المشروع.